A Seulo

Seulo situada ind’una costa

ue sos antigos an fraigada

in tottue ses nomenada

capitale ‘e barbagia ti an posta.

Capitale tenes sa zente

de bellos modos e bellas maneras

sos montes riccos de abbas e feras

brinchende in serra badde o padente.

Bi tenes gruttas e domos de janas

de fronte e sa idda duas nuraghes

ma solu pro cussu non piaghes

ca produs tottu cosas sanas.

Festas nde faghes a fiottu

inde acude zente ‘e ogni logu

a sa murra giogant pro isfogu

senza pesare mai avolotu.

Zente meda bi tenes laureada

cussa a sa idda li faghet onore

massaias cun calchi pastore

atera zente in su rimboschimentu occupada.

Pro sas cresias aberzo uca

sa mazore est s’ imaculada

Santu Predu in pè Antoni iscuncordada

e s’Arbara in s’arcu e sa fruca.

Chimbe iddas tana circondadu

e tue in mesu che istella

contas sempre sa pius bella

cun totu su tou popoladu.

Sebastiano Murgia ... Sardaleddu